Два Божика од Лилјана Пандева

Светско, а наше!

Книгава е МОШНЕ забавна за читање! Романса која ги следи Дона и Хари низ Брисел, Лутон, Охрид, Софија и Скопје. Празничната атмосфера е одлично доловено, особено во Брисел и Лутон.

Напишана е мошне разговорно што ми беше симпатично, но одредени изрази се повторливи и искрено малку ме нервираа. На пример: сладолед во корнет во форма на дедомразовска капа, добро де, сантаклауска капа; тезги од божикниот пазар, добро де, никој не го вика така дури ни во Македонија, значи божикниот маркет…; Божиќ, добро де за Крисмас; ќе се измешале баби и жаби, добро де, историја и политика.

Ох, колку ми е познато пренасочувањето на летови и прелетувањето на Европа. Ги споделувам чуствата кон Визер! А постојаните разговори со мајката за тоа каде е, што е, итн се одлично доловени, токму како моите разговори со мајка ми.

Политичките дебати на трпезата во Лутон, како за Брегзит така и за договорот со Грција, бугарските пасоши се спомнати како актуелни теми, сепак центарот на приказната е развојот на романсата меѓу Дона и Хари (морам да ги прокоментирам имињата, но само со оние кои веќе ја читале книгата!).

Се смеев на глас на обидот на Хари да го изговори македонското презиме на Дона, и на забелешката дека ни професорите на Оксфорд не го подготвиле за таква јазична дилема, го прекршува јазикот за да го изговори, но и на место е коментарот дека „Сите што ги познавам од словенските земји одлично зборуваат по неколку јазици, насмеани се и кога ситуацијата не го дозволува тоа, и искрено се љубезни“.А, Дона пак нарачува лате и еспресо истовремено, едното како замена за утринскиот чај што го прескокнува, другото да ја држи будна до пладне. Би можеле да бидеме пријателки, да, да ако се додаде уште некој чоколаден колач во приказната. Нејзината елка ми дава идеи за мојата елка следната година.

Вклучени се празнични традиции од секоја земја, а особено е симпатично како странецот го доживува бурекот во Охрид, восхитен од убавината на езерото, па и кршењето на лепчето со паричка. Дона му објаснува дека „во оваа земја се може да е мало освен порцијата за храна“.

А за крај: „Ти навистина мислиш дека ќе поминеш само со два Божика? Има и две Нови години. Во светот се е поубаво во пар“. Се надевам дека тоа значи дека ќе има уште една книга догодина? Да скратам, модерно, кратко и забавно четиво, совршено за празниците. Недостига ваква литература на домашниот пазар и мило ми е што ја прочитав. Понатаму ќе се чита и Доилката од Пандева.

Која е Вашата омилена Божиќна приказна?